Tacirin etiraz aksiyası

        Azərbaycan dünyanın ən gülməli, həm də ən acınacaqlı dövlətidir. Heç zəhmət çəkib ölkəmizi Afrikadakı yoxsul ölkələrlə müqayisə eləməyə cəhd etməyin. Birincisi, onlar de - fakto dövlət deyillər, çünki əksəriyyətinin ordusu, dövlət başçısı belə yoxdur. İkincisi, onların dərdlərinin kifayət qədər konkret və qısamüddətli tədbirlərlə uzunmüddətli həlli var - oranı lazımsız ünsürlərdən təmizləyib sənaye kompleksləri yaradan olsa, bütün problemləri həll olunar. Amma bizim cəmiyyətə nəzər salanda fəlsəfə, iqtisadi, siyasi düşüncə - qısası intellektual resurs sayılan bütün növ düşüncələr çökür. Niyə?

Çünki Azərbaycan cəmiyyəti azı 50 milyon cür düşüncəni özündə daşıyan xaotik bir topluluqdur. Bu iddiamla riyazi məntiqi də çökdürdüyümün fərqindəyəm, amma hər gün gördüyünüz insanlara nəzər salsanız görərsiniz ki, həqiqətən də bir insan içində 5 -6 şəxsiyyət daşıya bilir. Bizdə bir insanın bir obyektə, hadisəyə münasibəti subyektiv belə deyil, polisubyektivdir (fəlsəfəyə gətirdiyim yeni terminə görə məni təbrik edə bilərsiniz). Yəni, biz hər hansı obyekt, hadisəyə münasibət bildirərkən o qədər faktoru istəyərək və ya fərqinə olmadan nəzərə alırıq ki, sonda o münasibətdə subyektivliyin təhqir olunmuş variantı qalır. Şəraiti nəzərə alaraq hadisəyə münasibət tipik tacir xarakteridir. Biz millət olaraq tacir xarakterindəyik,bunu qəbul eləməyin vaxtı çatıb.

Bu günə qədər ölkədə bəlkə də yüzlərlə bina sökülüb və onların içində etiraz aksiyası keçirənlər də az olmayıb. Lakin mən indəyəcən görməmişəm ki, özü yaşadığı binanın sökülməsinə etiraz edən bir nəfər sabah başqa bir binanın sökülməsinə etiraz edən  həmyerlisinə dəstək versin. "Mənə nə?", " O mənə dəstək vermişdi?"

İndiyəcən bəlkə də 30 etiraz aksiyasında iştirak eləmişəm amma, görməmişəm ki, o aksiyalarda evləri sökülən məzlumlar da iştirak eləsinlər. Seçki yaxınlaşanda da o məzlumların hamısı öz evini sökənlərə səs verirlər. Onlar öz talelərinə laqeyddirlər, ya saf uşaqlar kimi kin saxlamırlar? Qətiyyən elə deyil. Bəs onlar özlərinə zülm edən adamlara harada etiraz edirlər? Bəli, tinlərdə və ya qiybətlərdə. Sizə yalan danışıblar əzizlərim, Nikolayın evini dedi - qodu yıxmayıb, üsyan yıxıb. Niyə qorxursunuz? Əsgərliyə övlad göndərirsiniz - tabutu gəlir, ev alırsınız - dövlət onu xarabaya çevirir, məktəbə uşaq yollayırsınız - qoyun gəlir, xəstəxanaya hamilə qadın yollayırsınız - iki meyit gəlir, əziyyət çəkib mənəviyyatlı, tərbiyəli, ədalətli övlad böyüdürsünüz - sabah MTN gəlir ona "anarxist"  ayaması qoşub öz təcridxanasına qaçırdır (bəli, məhz qaçırdır). Hələ özündən aşağı rütbəli zabitin həyat yoldaşını zorlayan "qəhrəman" generallarımızı, sənin 20 Yanvarda tank qarşısında durmaq bahasına müdafiə eləməyə çalışdığın bayraqdan tutub qızını tutan qarnıyoğun polislərimizi heç demirəm.

P.S. Qurşaqdan aşağı zərbə vurdumsa, bağışlayın.

17 Fevral 2014- cü il